What We Believe (Zeidah kan zumh)

Paul nih Timote cu ca a kuat. "Pathian nih Thawngtha thanhtu ding ah lamkaltu le cawnpiaktu ah a ka ser tiah a ti. Sifahnak kan inmi vialte hna hi hi ruang ah hin a si. Asinain, ka lung a dong naisai lo, zeicatiah kaa bochanmi [zumhmi] cu ahodah a si kha ka hngalh I ka kut chung ah a ka pekmi thil kha khi Ni tiang him tein a ken khawh ti kha *ang tein ka zumh" a ti [2 Timote 1:11-12]. Pathian [Pa le Fapa le Thiang Thlarau] kong Thawngtha chim ding ah *al a sinak kong a chim.

PATHIAN (GOD)

Pathian cu pakhat a si [Exodus 20:2-3; James 2:19] Pa le Fapa le Thiang Thlarau tiin a lang. Pa cu Pathian a si. Fapa cu Pathian a si. Thlarau cu Pathian a si. Pathian pathum a um tinak a si lo. Pa le Fapa le Thiang Thlarau cu Pathian pakhat an si. Pa le Fapa le Thiang Thlarau cu an i tluk. A lian deuh le a fa deuh an um lo. Pathian cu pakhat a si nain, Pa le Fapa le Thiang Thlarau tiin pathum in a lang [Genesis 1:26; Isaiah 6:8; Matthai 28:19-20; 2 Korin 13:1; John 1:33-34; 10:30; 14:9, 16, 26; 16:13-15; 17:21; 20:21-22; 1 John 5:7; 4:2, 13-14]. Van le vawlei hramthok in Pa le Fapa le Thiang Thlarau cu rian an tuan ti hna.

 Pa (Father)

[1 Korin 8:4-6]: Pathian cu pakhat lawnglawng a um i amah cu kan Pa, zeizong vialte Sertu kha a si. Filipi 1:2: Pathian kan Pa le Bawipa Jesuh Khrih nih vel le daihnak in pe ko hna seh!　

 Fapa (Son)

[Genesis 3:15]: Mi nih na lu kha rial an zuam lai [Hi hi minu Mary nih a hrinmi Jesuh a langhnak a si. [John 1:1]: Vawlei hi ser a rak si hlan Bia cu a rak um cang; cu Bia cu Pathian sin ah a rak um i cu Bia cu Pathian a si. [John 1:10]: Bia thawng in Pathian nih vawlei hi a rak ser. [John 1:14]: Bia cu minung ah a cang i kan lak ah khua a rung sa.

 Thlarau (Spirit)

[Genesis 1:2]: Rilipi cu muihnak nih a khuh i Thlarau cu aa chawk. [Lamkaltu 5:3-5]: Thlarau cu Pathian a sinak a langhter. Thlarau sin ah lih chim cu Pathian sin ah lih chim a si a ti.

Theih Herhmi

Pathian kan biak tikah Pa le Fapa le Thiang Thlarau hi an i tluk, hmun khat ah an um ti, Pathian pakhat an si ti hngalh a herh. A tluk tein Pathian an si caah pakhat khat hi uar hlei ding a si lo. An pathum in Pathian an si ti. Pa lawng maw, Fapa lawng maw, Thiang Thlarau lawng maw, kan zumh ding a si lo. Pa le Fapa le Thlarau hna thumkomh Pathian hi kan thangthat ding a si. Kan thinlung ah cuan ter ding a si.

Khamhnak (Salvation)

Jesuh Khrih a zummi nih Pathian Khamhnak [zungzal nunnak] hi kan ngei. Jesuh Khrih cu Khamhtu a si. Kan sualnak in khamh le chanhchuah ding in Moses nih dar rul kha thetse ram lakah a tar bantuk in Mi Fapa Jesuh Khrih hi vailam cung ah tar a si. Amah a zummi paoh nih zungzal nunnak kan ngei. Khamhnak kan hmu. Thlarau in a hrinthar/than mi kan si [John 3:14-15]. Khamhnak hi kanmah nih kan tuah ruang ah a si lo. Khrih nih kan caah khamhnak a ser cang ti kan zumhnak thawng in a si. Minung nih kan tuah khawhmi a um lo. Pathian kan bochan i Khrih kan zumhnak in khamhnak kan hmu. Cu vialte cu Thlarau Thiang nih a kan bawmh, lungpemnak a kan pek caah a si [John 14:26]. Paul nih *angkhun in a theih. Khrihfa zumtu hna hremtu a si. Khrih nih "Saul, Saul, zeicadah na ka hrem" a ti. Paul nih Ahodah na si, Bawipa? a ti. Keimah cu na hremmi Jesuh ka si" tiah Khrih nih a leh [Lamkaltu 9:4-5]. Khrih bia cu a zumh tikah khamhnak a hmuhmi cu a *ang. "Nannih cu vel an ngeih hna caah an khamh hna I khamhnak nan hmuh cu amah nan zumhnak thawng in a si. Khamhnak nan hmuhmi cu nanmah tuahmi a si lo, Pathian laksawng a si" a ti [Efesa 2:8]. Khamhnak cu kanmah tuahnak thawng in a si lo nain, zumhnak kan ngeih i kan hrinthan hnu ahcun Bawipa caah le mi dang caah tuah ding tampi kan ngei. A Thawngtha chim ding ah rian kan ngei. Hrinthan a ti tung i tuahnak a ngeilo mi le nunzia aa thleng lo mi cu zumtu tling kan si lo. Tuahnak aa tel hrimhrim a hau.

Khrihfabu [The Church]

Khrihfabu cu Khrih pum cu a si [Efesa 1:13]. Zumtu hna cu Pathian muisam keng in sermi kan si [Genesis 1:27]. Zumtu hna cu Khrih ih A pum tengnge kan si. Paul nih "Kan pum cung ah hin nge tampi kan ngei i hi ngei vialte hi rian dangdang an ngei cio. Cu bantuk cun, kannih zong hi mi tampi kan si nain Khrih he kan i pehtlaihnak thawng in pum khat kan si i pum nge dangdang cu pakhat le pakhat an i pehtlaih dih bantuk in kannih zong pakhat le pakhat kan i pehtlai dih ve" a ti [Rome 12:4-5]. Pathian nih A vel thawng in laksawng a phunphun a kan pek. A khrihfabu thatnak caah a si [Rome 12:6-8]. Khrihfabu cu Khrih pum a si caah, mi kip nih A ngeitu Khrih Pathian cu kan tihzah awk a si. Pakhat le pakhat hi Khrih pum tengnge bantuk in kan i hmuh i kan i dawt le zohkhenh kan herh.